-Pu. Lalneihtlina Hnamte (Maneiha)
Kum 2040 kan lo chuangkai ta. Mite chuan Sihfa khuain heti taka hma a sawn chhoh dan hi hriat an chak a, rual û zawk ten zawhna an chhang tam ta hle. Kei pawh kum 70 ka lo chuang ve ta a. Kum 2020-a kan nu leh pa, hetianga kan hmasawnna tura bultantute pawhin mual an liam zo dawn ta. Kum 2020-a piang te chu kan thalai neih te an lo ni ta. Khaw hmasawnna tura tan latute chu zahin, an zalhna thlanmual te pawh uluk taka cheibawl ani ta zel a ni.
Saitual District-a office pui ber DC office chu, tunhma KVI hmunah changtlung takin a awm a. A lun hle mai. Kum 20 kaltaa khaw hmawr ni thin kha khaw laili taka awm ang maiin, a velah office quarters leh mimal in tha leh mawi tak tak a awm fur a. Rulkhai pheiah te chuan dawr tam tak leh hotel changtlung tak a intlar thup a. Lungmantamkawn, tuna District Jail pengah chuan 'Sihfa vengthar i lo thleng ta' tih ziak mawi leh fiah takin a intar a. Rulkhai ram chhuahlam te, Tamdil kawng leh a chunglam Ramlaitui mual te chu Sakeithingliahkawn nen inthlunzawmin in tam tak a ding a. Sihfa ram, khaw dangin an leite chu in hmunah a lo chang a. A ram neitu Sihta khua te remhriatna azarah Sihfa khua tih hming a pu lo thei tawh si lo. Khaw dang atanga pem lut an tam poh leh Sihfa ti ropuitu an lo ni ta zel mai a ni.
Rulkhai phei, Sihfa vengthar atang chuan kawngpui zau leh nuam tak, Liannawna tui hnuaiah a kal ruah mai a. Liannawna tui leh dapzar ram mualte chu khaw dang atanga rawn pemte leh sawrkar Department Training Centre te, an office nen khawlian tak ni mai turin a inbuatsaih mup mup a. Heng rulkhai, Ramlaitui leh Dapzar veng te hi, Sihfa vengthar VC-in a awp a. Municipal Council neih a nih ve leha Sihfa veng thar Local Council ni nghal tur an ni.
Liannawna tui hnuaia kawngpui zau tak chuan Dapzar veng a rawn paltlanga. Pu B.Lalhmua lung lakna (Quary) ni thin hrulah phei nuam takin Chaltuaia tauhlung kham a rawn su tlang a. Bawng thihna ruam atangin khawthlirah rawn lutin, Dama tui kawng zawhin Sihfa venghluna rawn lut ta. Tunah chuan Sihfa VC kha VC 3-ah a lo inthen tak avangin, Sihfa khua kha Sihfa venghlun tih a lo ni ta a. Halrum ram lamah Sihfa kawtchhuah thar nuam tak a lo awm tak avangin, Sihfa khuaa indang thar ten khaw plan fel tak hnuaiah Dama tui leh khawthlir thlengin in an sa zel a. Pem lut an awm ve reng avang leh sawrkar hmun pawimawh a lo awm zel avangin, khawthlir leh Dama tui inkar chu mihring an tamin a lun hle mai. Sihfa hmunthar veng tiin VC hran siam a lo ni ta bawk. Sihfa VC-3 Vengthar, Hmunthar, Venghlun te chuan Joint VC an din a. An inlungrualin khawtlang tan hmathlir fel tak an nei a. Sihfa mawngping ni thin kha, Mualkhang ramah Phullen kawng nuam takin an tlangtir a. Sihdarh lei tha tak Phullen kai hrulah a awm chinah chuan, Kawng hnai leh nuam zawk zawhin driver te chuan Sihfa kawng lo chu an zawh peih ta lo.
Halrum ram pengțhuamthum kawngphei chu kawngpui nuam leh zau takin a kal a. Chu chuan Saichal kai NEC road, Saitual tui pump-na bulah a fin a. Tualbung leh Khanpui khaw inkar kawng a nawm tawh avangin, Ngopa leh khawchhak lam ten
Aizawl an panna kawngpui a lo ni ta bawk.
Kum 20 kaltaa Sihfa khawtlang inlungrualna leh an finna chuan, an khaw lal ram hmun pawimawh chu luahin khuaah an siama, Khaw thar dina nekchep theih an ni tawh lo. Saitual, District capital chuan hma a sawn zel a. Khawvel ram dang atanga khualzin te hip tura lo kal tan, boruak leh hrui (Rope way/sky walk) hmanga
hawithawvenna tur dahna turin Sihfa ram chu a dawnthleng rem ber a lo ni ta si a. Hmunpui tlang, tun hma Pu.H.Thanzama huan leh a vel tlang zawl chu Thlawhtheihna te deuh/air bus tumna turin buatsaih fel ani tawh a. Halrum kawnga Pu.Lungmuana huan tlâng ni thin leh, pengthuam tlâng te chu Helicopter tumna tura buatsailhin, Halrum tlâng phei chu Indian Air Force lamin ramri venna hmun/post atan an hauh fel der tawh bawk. Ruahtui tamna ram kan nih avangin, Saitual Saihmar tlanga tum ai chuan, chhum leh thliin a tihbuai loh zawk vangin helai hmun hniam zawk hi thlang an lo ni.
Halrum kawnga Pu Lungmuana huan tlâng atangin hrui hmanga inkalpawhna rope way chuan Dispensary tlang/tanky awmna a thlunzawm a. Sikul tlâng/Upa Pawl ram leh Vawnglawn tlâng a thlunzawm bawk a. Dawrkawn zawn atangin Tamdil leh khaw tam tak a hmuh theihin khualzin ten nuam an ti hle. Ram chhunga sikul naupang leh chhungkaw bila zin thawvenna hmun ber a lo ni ta. Sihfa chuan hmun roh bik an nei a, sikul tlâng/MUP ram leh vengchhak thlanmual ram hi in saka tihchereu an phal lo. Tuihna siam leh nungchate tan an cheibawl a. Zirlai ten zirna an neihna hmun a ni. Dispensary/YMA Park erawh Damdawiin atan sawrkarin an dil angin pek an ni chauh. Mualkhang ram leh Valam ram chu ngaw a lo ni ta a. Quarry-a lung hralh bak chu nungchate leh zirmite tan humhalh ania. Sihfaah tui harsatna a tlem phah ta a ni.
Chhungkhaw thenkhat chuan Malpuichang leh Halrum ram pheia sawrkarin thlai chin leh enkawl dan zirna a buatsaihah ei an zawng a. Anmahni tan lehkha an zir a, an huanah ngei zirtirtu hna an faten an thawk ta a ni. A thenin Hotel management te zirin Hotel an siam a. Khualzin lo chhawntu/Receptionist hna phei chu hlawh sang takin an thawk a. Thalai dangte an chhawr bawk a. Hmunpuia Pu.F.Lalchamzuala ram ni thina Football stadium leh a vela Sports Complex-a hnathawh te, Sihfa-a rope way leh swimming Pool-a Fee lo dawn te chu khawtlang sumhnar a lo ni ta a ni. Zirna in leh Kohhran rawngbawlnaah pawh thlarau nun thlengin hmasawnna tha a lo awm ta.
Kum 2022 atanga seminar te neia khawtlang hmathlir an neih te chuan mipui leh hruaitute rilru a siam thar a, Party mite pawhin an khua an hmangaih hmasa a. Party dangte nen Joint Commt. te neiin, Kohhran/NGO te nen an sawrkar MLA tihtur chin an siam a. Rulkhaia ram nei te, in saa bulțan turin an inngena in sa tur te VC te nen an inpui bawk a. Khaw chheh vela ram nei ten phal takin an ram an pe a. Ram petute hre rengin sawrkar hna leh an ram chhunga thawh tur awm te an thawhtirin an duhsak let a. Rin phak lohvin Sihfa chu a lo awm ta a ni.
[He article, 'Sihfa vision 2040' tih ziaktu hi Pu. Lalneihtlina Hnamte a ni. Ram hmasawnna tura rilru leh ngaihtuahna muthlu lo, theih ang tawka ram leh khawtlang tana tha leh zung seng thin a ni. NGO pawl hrang hrangah hruaitu lo ni tawhin hruaitu nihna a chelh loh lai pawhin tha leh ngaihtuahna thlah lovin ram leh khawtlang hmâ ngâi takin a thawk kumtluan thin a ni. Article tha tak tak ziak zel turin duhsakna ka hlan e.]
Comments
Post a Comment