MIZO THUFING ( PROVERB )

1. Lal ngai lo lal a na, an lal a kha.

2. Lungpui pawh lungtein a kamki loh chuan a awm thei lo.

3. Mahni infak leh sakhi ngalah engmah a bet lo.

4. Mi chhe sawi chu koh aiin an hnai.

5. Sial rangin sial rang a hring, sakawlin sakawl a hring, Sunhlu kungah thei dang a rah ngai lo.

6. Mihring hmelma ber mahni a ni.

7. Mi fingin an fin man an ei seng lo, mi a-in an at man an chawi seng lo.

8. I tuma lum chu bei fan fan rawh. Ui pawh a vah a vah chuan ek thing a tawng nge nge.

9. A ṭha lam kawng a chho, a chhe lam kawng a phei.

10. Piansual leh hmel chhiat a sim theih loh; nungchang erawh a sim theih.

11. Piangsual nuihsan suh, piansual leh pharin tlai luat a nei lo.

12. Lampui changkhatah mi an be chhe ngai lo.

13. Kawng laka chau tanpui zel tur.

14. Thlawhhma lakin, hniak tamna lam apiang bawh tur.

15. Leiruangtuam, sih, thinglubul, fangfar, thingzungkai, zawngluro, hruiawk leh thingsaihrua lovah neih tel loh tur.

16. Mual dungah thlam sa rawh, sapuiin a bei ngai lo.

17. Lo hman niin thlam tlawh a thiang lo.

18. Thlam velah zamzo chin ziah tur.

19. "Khua tlai" tih hi ching rawh, a tulna hun apiangah.

20. Sem sem dam dam, ei bil thi thi.

21. Nu leh pa pawisa lo dingchhuak an vang hle.

22. Nu leh pa mawl biak hi thiang lo tluka ngaih a ni, an hming pawh sawi mai mai suh.

23. Mi awkhrawl a hlawhtling rih thei, mahse, a tlu phut thin.

24. Anchhe lawh hi mahni chungah a tla thin.

25. Nupui nena hmarcha sawh bawl fo ai chuan inthen mai tur, Hmeichhia leh palchhia chu thlak ngai a ni.

26. Hmeichhe tawng menah thlak rawh. Hmeichhia leh uipui chu lo rum lungawi mai mai rawh se.

27. Mikhual hnenah engtikah nge i hawn ang ti lovin, eng chen nge i la cham ang ti zawk rawh.

28 Kawng thlangah zung la, chhak lamah e rawh.

29. Thinglera zun dawnin "Ka ralthawl a bua e, kei zui loh" tih ziah tur.

30. Lui tui in dawnin, "Tui thiang tui dam, tui nunnem, amah avanga buh leh sa kan bar puk puk" tih tur a ni. Dai dawnin chem chiah a, "Thir dam emaw, chem dam emaw," tih tur.

31. Bawlhlo tiduhdah suh.

32. Thang awk ru suh, sakuh awk ruk phei chu sakei sehna.

33. Laichin leh thian inah lo chuan thalai tan sa chhim loh tur.

34. Tlubing te, keptuam te leh rul ke te hi hmuh thiang lo a ni.

35. Sakei ek zuk leh van ekkhum chu chawplehchilhin a pawi.

36. Thenawm emaw, mangang thawm reng reng hria chhan ngam lo chuan pawnfen feng nghal rawh se!

37. Nunau tithlaphang zawnga tualchhunga che mi chu a chi thlah tam hmain thah nghal tlak a ni.

38. Thil hmingthang tidanglamtuten thlahlei an vei ngai lo.

39. Hreipui, tuthlawh leh puan ruk chu mahni thlan laih nan leh ruang tuam nan hman a tul duh hle.

40. Thenawmte do aiin, khaw sarih do a thlanawm zawk.

41. Luipui tlak dawna pa kuk ruih ruih leh, hmeichhe hriat atana pa aw thian kuk kuk chu pa rawn tlak an tling ngai lo.

42. Khawtlang awm ni serh loh hi vanni salna a ni duh.

43. Lasi thang hi sah chhiat zel tur a ni, awh palh a hlauhawm.

44. Rui chunga nula rim leh khawlai kal ching mi hi chapo chhinchhiahna a ni.

45. Ruai thehnaah sa dap suh, hlui dangah pawh kil nawn suh.

46. Pumah hmeichhia lal tur, tuikhurah mipa; mipain lo vat se, hmeichhiain thlai chi thlak rawh se.

47. Sa beihnaa thiante chhan ngam lo chuan fawnfen feng rawh se.

48. Phir pianghlim ennaah, a va rapthlak em tih zawk tur a ni.

49. Duh loh nena khuangchawi ai chuan duh tak nena kum thum bahra laih zawn a thlanawm zawk.

50. Thing phur khat leh pasal pakhat hmuh zawh loh thu va awm suh.

51. Ram mi tawk apiangin maucheh siam zel tur.

52. Samawngping kawmthlangte pek tur, kawmthlang nei lo chuan kawmchhakte pek tur.

53. Tawngkam thain sial a man.

54. Pal sawn chin hi mi duham, mi thawveng rei lo tur hna a ni; kawngpui pin phui lek phei chu a thiang lo.

55. Nupui fanau riltama thih tep tawh a, chhek in buh ru ngam lo chu pa tling lo an ni.

56.Sawntlungah hma an phel ngai lo; sakeiin a seh duh.

57. Thing zung tuah suh, hnute a pan duh.

58. Mahni lo hlui chiah theh khatnaah an nei ngai lo, "Ka ar bo a lo hawng leh ta," a ti a, min talh mai.

59. Ramvahnaah naupang an hnuhnung ngai lo, laikingin chil a chhak duh.

60. Saiin a tluangah thing a kham chuan chhui tawh loh tur.

61. Sakei aih niin la lamin deh loh tur.

62. Nu leh nu insual pain thelh loh tur.

63. Vapual, kawlhawk leh vahai bu lak chuan thinghar hnutchhiah tur.

64. Khaw chhunga muvanlai nupa inthen, chhim leh hmar pan kher hi, nupa tang thenna emaw, lenglai thihna emaw a thleng duh.

65. Kawng kham zawnga Thingkhawsa tlu hi lenglai thihna.

66. Sakeiin sa awk a lak chuan chhuh loh tur.

67. Mi zawnna hlang chema phelh loh tur.

68. Belthlengah chaw ei loh tur, naupangin lo ei palh sela, "Khua leh vangte u, lo ngaidam rawh u," tih tur.

69. Vapual, kawlhawk, vahai pa no chawm la, nupa tang thenna.

70. Innei turte inah ruang chhuak sela, inthulh tur, hun dangah thar thawh leh tur.

71. Balhla vuiin a neitute khumpui a kawh chuan ruang a chhuak thin.

72. Phunchawng phun chu khuangrual a nihin a phuntu a thi mai thin.

73. Sakei, a hnu a rul chuk chuan kir san tur, vanduai a hauhawm.

74. Naupai laiin a pain hengte hi a thawk tur a ni lo :- Ranpui talh, rul thah, hlang zawn, vawk kuang suih, thlengpui leh thutthleng tuk; nau piangin , "Kutchuk" a nei duh.

75. Naupaiin luipui a kan chuan luipui huaiin nau kha a lo hmu a, a tla mai thin.

76. Mi in aia pawng bikin in sa suh, "Mi anchhia zawng zawng dawn ka huam e," tihna a ni a, a thu neitu ber an thi duh.

77. Kawn hnawhin in sa suh, Ramhuai liamna a ni; sak rawttu emaw, a satu emaw an thi duh.

78. Kawt lama in sak zawm sei chu thihna a ni.

79. In sak thatin chenna lai sak hnan lovin thiat rawh; van ni an sal duh.

80. Vantlang kawng hnawh emaw, tihdanglam emaw a thiang lo' ruang a chhuak duh.

81. Mihring leh ranpui nghaisatu chuan thlahlei a vei ngai lo; thlahte thlengin an riral duh.

82. Thlan laihna hmanraw thir tuai thar leh loh an chhungkua ten hman mai loh tur. Thlan laitute pawhin a neituten tui an lum sak a, buhfai tlem an thlakah kut an sil kher tur a ni.

83. Nula leh tlangval, khaw danga tlan dun turin, an kal lohna tur lam kawtchhuahah chhawl an zut thla hmasa tur a ni; chumi hnuah an kalna lam turah an kal vang vang tur a ni, an chhawl zut thlak kha sakeiin a chhiar ang a, a chhiar zawh hmain an kalna tur khua chu an thleng hman ang a, an him tawh ang; sunhlu hnah an zut kher thin. (Hemi an chinna chhan chu, hman laiin Nula leh Tlangval tlan dun sakeiin a lo seh vang a ni.)

84. Kawmchar lam sumhmuna hman leh a thiang lo, ruang a chhuak duh, "Tlunglet" an vuah.

85. Khum hmanraw hlui tuah hian riralna a thlen duh.

86. Pawnpui chhawm tur tah sual chu inneih thulhna a ni.

87. Banglai tah sual chu dam theih lohna.

88. Lo ri kham kawih chu hrisel lohna; sawn phei chu thihna.

89. Ar rila invawm hi tualthat tluka ngaih a ni, a vawmtu leh a vawma tan a tha lo ve ve.

90. Farṭuah leh khiang hi Luseiin eng kawng mahin an hmang thiang lo. Farṭuah hi mitthi rawp lam tur ruangruha hman a nih vang leh, khiang hi inurna kuanga hman a nih avangin.

91. Nupui rai laia nghafuan ven chu hlawhchhamna.

92. Mahni deh chhuah chhungte tel lova ei riral ngai a ni lo.

93. Nuam sip bawl leh nawm chen hi ching suh.

94. Kawmthlang lamah makpate in saktir suh, pute thli an dawl zo lo va, an hrisel thei lo.

95. Tapchhak zawn vela maimawm a lo uai thlak chuan inleng neihna; khum bula lo uai thla chu damlo en.

96. Kum khatah in khat atangin pakhat aia tam pasal neiin kal chhuah a thiang lo.

97. (a) Ngawidawhnaah ngawipu atan tui tla tawh chhung zinga mi an awm chuan hman ngei tur a ni.

(b)Ngawi pal thingtuaite kha 'Ngar, a hnawhna chhawl kha 'Tam'tih tur. 'Ngawiah sangha a tla' ti lovin, á tawlh' tih zawk tur.

(c) Ngawia sangha chu a hmuna chawfak apiangin duh tawk ei theih; te tak te hawn pawh chawina a ni.

98. Puithu hi thlahte thlenga vanneihna.

99. Sailo lal leh Sakeiin thil piangsual sa an ei duh lo.

100. A chhan awm lova zan thum tlaivar chu, rethei tur chhinchhiahna a ni.